Kalamuaren kontsumoari buruzko kanpaina
Bergarako Udalarentzat garrantzizkoa da osasunaren sustapena lantzea, baita adikzioen arloan ere.
Adikzioen arloan ere osasunaren sustapena lantzea garrantzizkoa da Bergarako Udalarentzat. Ildo horretatik jarraituz, udalak bat egin du Eusko Jaurlaritzako Osasun Sailak nerabeen eta gazteen kanabisaren kontsumoari lotuta martxan jarritako sentsibilizazio-kanpainarekin.
Izan ere, Euskal Autonomia Erkidegoan kanabisa da gehien kontsumitzen den legez kanpoko substantzia, batez ere 15 eta 24 urte bitarteko gazteen artean; erraz lortzen da, prezioa beste legez kanpoko droga batzuena baino baxuagoa da, eta arriskuaren pertzepzio soziala txikia da.
Baina ikerketek erakusten duten moduan, behin eta berriz kontsumitzeak ondorio negatiboak eragiten ditu osasun fisikoan, psikikoan eta sozialean, batez ere nerabe eta gazteengan, horien burmuinean substantzia psikoaktiboek eragiten dituzten ondorio negatiboak nabarmenak baitira.
Hain zuzen ere, kalamuaren kontsumo-eredu batzuek ondorio soziosanitario larriak ditu: osasun mentaleko arazoak, eskola-porrota, familia-, lan- eta/edo mendekotasun-arazoak… Bestalde, kanabisaren erabilera beste arrisku-eredu batzuekin ere lotzen da, hala nola beste substantzia batzuen kontsumoarekin (tabakoa, alkohola, beste droga batzuk), eta horrek areagotu egiten du jokabide horren arriskua.
Kanpaina hau tresna bat besterik ez da, gai honekiko herri moduan hezteko, kanabisari buruzko mito eta uste faltsuak agerian jarriz, kanabisaren kontsumoak ekar ditzakeen ondorio kaltegarriei buruzko pertzepzio errealista landuz, kalamurik gabeko aisialdiko ereduak bultzatuz, eta herritar eta herri osasuntsuagoak bultzatuz.
Horregatik honako mezu hauek zabaldu nahi ditugu:
- Kanabisaren kontsumoak kalteak eragin ditzake.
- Kanabisaren kontsumoak buruko arazoak sor ditzake.
- Kanabisa nerabezaroko ikasketetan lankide txarra da.
- Kanabisaren kontsumoak ez dio eragiten soilik kontsumitzen duenari, baita ingurukoei ere.
- Kanabisaren kontsumoak gizarte-harremanak zaildu ditzake.
Azken batean,
Kalamurik gabeko bizitzan
Zure bertsiorik onena garatuko duzu
Kalamurik gabe gehiago zara.
Goian esan bezala, herri moduan hezi ahal izateko, kanpainarekin bat egitera eta mezu hauek zabaltzera gonbidatzen ditugu herriko eragile guzti-guztiak: familia, eskola, eta gazteekin harremana duten eragile guztiak (kirol, kultura, aisialdi eta abarrekoak).
| Eranskina | Tamaina |
|---|---|
 triptico-eskuorria-kalamua.pdf | 2.86 MB |