webmaster-k Ar, 2026-01-13 09:23-n bidalia
Elgoibarko Txillarre baserria izan zen Euskal Herriko azken hamarkadetako mugarri historiko baten agertokia: ETAren jardun armatuari amaiera emango zion prozesuaren abiapuntua. Testuinguru horretan kokatzen da Txillarreko sukaldaria dokumentala, pertsona jakin baten bizipenetatik abiatuta memoria historikoa, elkarrizketa eta giza harremanak ardatz dituen lana.
Dokumentala eta ondorengo solasaldia urtarrilaren 20ean, asteartean, ospatuko da Seminarixoan, arratsaldeko zazpietatik aurrera.
Dokumentalak Peio Rubio du protagonista. Haren ekarpen isil baina erabakigarriari esker, garai oso konplexu batean, PSE eta ezker abertzalea mahai berean esertzea posible izan zen. Txillarre baserrian egindako elkarrizketa haiek izan ziren gerora bake-prozesuan urrats garrantzitsu bihurtu zirenen oinarri.
Lan honek ez du analisi politiko hutsa eskaintzen; kontrara, ikuspegi pertsonal eta humanoa du ardatz. Rubiok bizi izandako esperientzien bitartez, ikusleak gertutasunez ezagutzen du nola sortu ziren elkarrizketarako baldintzak, zein girotan egin ziren eta zein izan zen eguneroko lan xume baina funtsezkoa: harrera, elkarrizketa lasaia eta, askotan, sukaldeko lana bera.
Dokumentalaren emanaldiaren ondoren, solasaldia egingo da, ikus-entzuleek ikusitakoa partekatu, galderak egin eta hausnarketa kolektiborako aukera izan dezaten.
Emanaldiaren xehetasunak
• Eguna: 2026ko urtarrilaren 20a, asteartea
• Ordua: 19:00
• Lekua: Seminarixoan (Bergara)
• Sarrera: doan
Txartelak aldez aurretik eskuratu daitezke www.seminarixoa.eus webgunean edo Seminarixoko txarteldegian (asteazkenero, 18:00etatik 20:00etara). Gogorarazten da emanaldiaren egunean ordu erdi lehenago zabalduko direla ateak.
