webmaster-k Ar, 2026-02-17 07:49-n bidalia
Bergarako Udalak jakinarazi du San Martin plazan egingo diren obrak direla eta, Pentekoste jaietan San Martin plaza ez dela erabilgarri egongo ohiko ekitaldietarako. Ondorioz, aurten eszenatokia eta kontzertu nagusiak ezingo dira bertan egin. Hori dela eta, eszenatokia Oxirondo azokako aparkalekuan kokatuko da, eta, gainera, Bideberri kalean kokatutako txosnagunea Oxirondora ere lekualdatuko da. Modu horretara, jai gune erosoago eta handiago bat sortuko da Oxirondon, Xaxau-rekin elkarlanean.
Udaleko Hirigintza Sailak adierazi du plazako obrak ezinbestean egingo direla datozen hilabeteetan, eta, horren ondorioz, espazioa ez dela baldintza egokietan egongo jaietarako muntaiak hartzeko.
Egoera honi erantzunez, Bergarako Udalak erabaki du jaietako gune nagusia Oxirondo azoka kanpoaldeko aparkalekura eramatea. Bertan kokatuko dira:
• Txosnagunea
• Udaleko eszenatoki handia
• Kontzertu eta ekitaldi nagusiak
Lekualdaketa horri esker, espazio zabal eta seguru bat eskainiko da Pentekoste jaietako jarduera nagusiak normaltasunez ospatu ahal izateko, eta bergararrek nahiz bisitariek ohiko eskaintza gozatzeko aukera izango dute.
Erabakiaren berri emateko, Udalak bilerak egin ditu astelehen honetan Jai Batzordearekin zein Oxirondo inguruan bizi diren auzotarrekin. Halaber, udal ordezkariek herritarren ulermena eskertu nahi dute, eta azaldu dute erabakia antolaketa egokia eta segurtasuna bermatzeko hartu den neurria dela. Udalaren ustez, Oxirondoko kokapenak baldintza egokiak eskainiko ditu jaiak behar bezala garatzeko.
Era berean, Udalak gogorarazi du Pentekoste jaiak “bergararron parte hartzerako, ospakizunerako eta elkartasunerako momentu garrantzitsua” direla, eta antolakuntza taldeekin nahiz eragileekin elkarlanean jarraituko duela jaiak ahalik eta arrakastatsuenak izan daitezen.
