Bergarako Udalak, herriko farmaziekin eta osasun etxearekin elkarlanean, babesgune klimatikoak eskainiko ditu aurten ere, klima aldaketaren eraginez gero eta ohikoagoak diren bero bolada muturrei aurre egiteko. Ekimen honen helburu nagusia bergararren ongizatea eta osasuna bermatzea da, bereziki haurrak, adinekoak eta osasun arazoak dituzten pertsonak babesteko.
Bergarako Udalak San Martzial jaietako 2026ko egitaraua aurkeztu du. Ekainaren 30ean hasi eta uztailaren 5ean izango du egun nagusia, eta jai egitarauak adin guztietako herritarrentzat jarduera ugari biltzen ditu.
San Martzial egunean, ekainaren 30ean, goizeko 07:00etan hasiko da egitaraua kanpai jotzearekin, ondoren Santa Marinatik San Martzialerako igoera egin eta meza ospatuko da tontorrean. Jardunari amaiera emateko, San Joxepe elkarteak prestatutako txokolatada eskainiko da.
Debagoieneko Mankomunitateak ekitaldi publikoa egin du astearte eguerdian Aretxabaletako Ideienean, erakundearen norabide estrategiko berria eta irudi korporatibo berritua ezagutzera emateko. “Herriz herri. Aurrez aurre” lelopean, Mankomunitatearen aro berria iragarri dute, eskualdeko gobernantza eredua eraldatzeko apustua berretsiz, lankidetza publiko-komunitarioa eta gertutasuna ardatz hartuta.
Pasa den asteburuan, Bergarako Udalak, Odol Emaileen Elkartearekin elkarlanean, elkartearen ikurra udaletxeko balkoian jarri zuen, odol-ematearen garrantzia azpimarratzeko eta herritarren elkartasuna agerian uzteko.
Odol Emaileen Elkartearen helburuaosasun sistemarako ezinbestekoak diren odol-erreserbak beharrezko gutxieneko mailen gainetik mantentzea da. Elkartetik gogorarazi zutenez, odola ezin da fabrikatu: “Herritarren borondateari esker bakarrik lor daiteke”. Hori dela eta, asteburuko ekimen honekin, odol-emaileen eskuzabaltasuna eta konpromisoa aitortu nahi izan dira.
Juantxo Madariagaren Elebakartasun garaiak lana dagoeneko online eskuragarri dago, euskaraz eta gaztelaniaz, interesdun guztientzat. Liburuak Bergarako euskararen historia soziala aztertzen du, XVII. mendearen erditik 1876. urtera arteko aldia ikergai hartuta.
Egileak dokumentazio historiko zabala baliatu du garai hartako hizkuntza-errealitatea aztertzeko, eta Bergarako gizartean euskarak izan zuen presentzia eta bilakaera ezagutzeko ekarpen garrantzitsua egiten du lanak.
