webmaster-k Og, 2026-01-29 15:08-n bidalia
Bergarako Udalak martxoaren 28an ospatuko den Erramu Zapatuko Feriaren antolaketa abian jarri du, eta dagoeneko argitaratu ditu Eusko Label produktuen txosna, talo txosna eta artisautza zein elikagai postuen esleipenerako oinarri eta baldintzak.
Feria egun osoak honako kokalekuak hartuko ditu: San Martin plaza, Seminarioko patioa, Ibargarai hiribidea eta Simon Arrieta plaza, 9:30etik 14:30era.
Eusko Label produktuen txosna – Eskaerak martxoaren 4ra arte
San Martin plazan jarriko duen txosnaren ustiapena Eusko Label kalitatezko produktu bat bertan saltzeko adjudikatuko du. Eskaerak irabazi asmorik gabeko Bergarako elkarteek eta udalerrian jarduera sare aktiboa duten taldeek aurkez ditzakete. Esleipena zozketa bidez egingo da, martxoaren 11n, 12:00etan, Kerexeta gelan.
Eskaera-epea: Martxoaren 4a arte, egun hori barne.
Baldintza nagusiak:
- Produktua txosnan bertan prestatzea eta gehienez 2,5 euroko prezioan saltzea.
- Edalontzi berrerabilgarriak erabiltzea, derrigorrez.
- Langileek euskaraz jakitea eta kartelak euskaraz egotea.
- 375 euroko fidantza jartzea martxoaren 18a, 12:00ak baino lehen.
Talo txosna – Eskaerak otsailaren 27ra arte
Seminarioko patioan 6 × 4 metroko gunea jarriko da talo txosna bat instalatzeko.
Postuaren esleipena zozketa bidez egingo da martxoaren 16an, 12:00etan, Kerexeta gelan.
Eskaera-epea: Otsailaren 27a arte, egun hori barne.
Baldintza nagusiak:
- Taloak bertan egin beharko dira eta osagarri klasikoekin saldu: txorizoa, hirugiharra, txokolatea…
- Dokumentazio osoa aurkeztu behar da: IFK, IAE alta, Gizarte Segurantza/Hazenda egunean, erantzukizun zibileko aseguruaren poliza (gutxienez 150.000€), elikagaien manipulazio txartela, etab.
- Kartel eta testu guztiek euskaraz egon beharko dute (edo euskaraz eta gaztelaniaz, lehentasuna euskaraz).
Artisautza eta ganadu feria – Eskaerak otsailaren 27ra arte
Erramu Zapatuko Feria ohiko moduan antolatuko da, 41 elikagai postu eta 35 artisautza postutan banatuta.
Eskaera-epea: Otsailaren 27a arte, egun hori barne.
Esleitzeko irizpideak:
- Tokiko ekoizleak: 1 puntu.
- Artisau produktuak: 1 puntu.
-
Kalitate bereizgarriak dituzten produktuak (EL, JIB, AGB, ekologikoa…): gehienez 2 puntu.
Puntuazioan berdinketa bada, zozketa egingo da martxoaren 16an.
Baldintza nagusiak:
- Elikagaien segurtasun baldintza zorrotzak betetzea (erregistro sanitarioa, hozkailuak, etiketak, manipulazio txartelak...).
- Euskararen erabilera nahitaezkoa kartel eta informazio guztietan.
- Postuak 9:30erako muntatuta egotea eta 14:30ean jasotzen hastea.
Informazioa eta eskabideak
Interesdun guztiek eskatutako inprimakiak eta informazio osagarria eskuragarri izango dituzte Bergarako Udalaren webgunean: www.bergara.eus
Eskaerak posta elektronikoz bidal daitezke helbide honetara: ferixabergara@bergara.eus
