Euskadiko Nekazaritza eta Elikadura Ekologikoaren Kontseiluak (ENEEK-Ekolurra) eta elikadura mahaiak elkarlanean antolatutako erakusketa ibiltaria ikusgai dago maiatzaren 19arte.
Elikadura ekologikoarekin dena hobetzen da izeneko erakusketan, hamabost panel edo argibide taulak daude ikusgai; tauletan jasotako informazioa osatzen duten bideo laburrak ikusteko aukera dute bisitariek. Elikadura eta elikagai ekoizpen ekologikoaren onurak gizarteratzea da erakusketaren helburua, eta onura horietako batzuk goraipatzen dituzte paneletan: elikagai ekologikoen kalitatea, ekoizpen ekologikoak ingurumenean duen eragin positiboa, arreta eta osasun printzipioak, tokiko ekoizleak, konfiantza eta gertutasuna, edo animalien ongizatearekiko ardura, besteak beste.
Elikagai ekologikoen ekoizpena kontrolatu eta ziurtatzeko Europako arauak betetzen direla bermatzea du helburu ENEEK kontseiluak. Eta nekazaritza eta elikadura ekologikoaren kontsumoa eta hedapena sustatzeko ekimenetako bat da berau.
Erakusketa azokako bigarren solairuan ikusgai dago azoka irekita dagoen ordutegian, astelehenetik ostiralera, 9:00-20:00; larunbatetan: 8:00-18:00.
PASTA EKOLOGIKO TAILERRA:
Horrez gain, Pasta Ekologiko Tailerra antolatu da maiatzaren 16ean, arratsaldeko zazpiak eta erdietan (90 minutuko saioa).
Hezitzaileak Txaramela Kooperatibako ekoizleak izango dira, eta gehienez 24 pertsonek parte hartu ahal izango dute. IZEN-EMATEA: https://erabili.liberaforms.org/pastatailerraoxirondo
Eguneroko otorduetan zerealak aurkitzen ditugu, hau hizpide hartuta partehartzaileak Kontsumo arduratsuan barneratuko dira, elikagai baten jatorria eta egiteko era deskubrituz. Pasta lortzeko eraldaketa prozesuaren erakusketa dinamikoa eta parte-hartzailea. Tailerretan tallarineak eta barazkiz betetako rabioli ekologikoak egingo dituzte. Orea irin integralarekin egina eta barruan sasoiko eta bertako barazkiak erabiliz. Egindako pasta etxera eramateko aukera dago.
Bergarako Udalak 2025eko udarako aisialdi eta kirol jardueren eskaintza zabala aurkeztu du. Helburua da haur eta nerabeei aisialdi hezitzaile eta aktiboa eskaintzea, euskaraz eta lagun artean, udalerriko instalazio ezberdinak eta ingurune naturala baliatuz.
Aurten ere, eskaintza oparoa izango da: udaleku irekiak, kirol kanpusa, igeriketa ikastaroak, eskalada eta beste hainbat kirol jarduera.
Maite Usabiaga zinegotziaren hitzetan, helburua anitza izatea bada ere, eta horretarako izaera desberdineko ekintzak antolatuko ditugu, ‘Udakikuka’ren asmoa badal lerro pedagogiko bateratu batzuk jarraitzea eta haurrek udaran euskaraz aritzeko espazioak sortzea, harreman berriak egiteko aukerak eskainiz eta balioetan heziz”.
Informazio guztia hurrengo loturan kontsulta daiteke: https://bergara.eus/eu/node/18115
Udaleku irekiak: hezkuntza eta dibertsioa uztartuz
Bergarako udaleku irekiak ekainaren 23tik uztailaren 18ra bitartean egingo dira, parte-hartzaileei 3 edo 4 asteko egonaldia aukeratzeko aukera eskainiz. Jarduerak goizez izango dira (10:00etatik 13:00etara).
Parte hartzeko baldintzak:
- 2013-2020 artean jaiotako haurrek izena eman dezakete.
- Haurrak Bergaran erroldatuta egon beharko dira edo udaleku garaian bertan bizi (familiarekin edo harrera familiarekin).
Angiozarren eta Osintxun ere udalekuak eskainiko dira, gutxienez 12 haurreko taldeak osatuz gero.
Izen-ematea:
- Apirilaren 28tik maiatzaren 15era.
- Online (www.bergara.eus) edo aurrez aurre (Udaletxean-B@Z eta Liburutegian).
Prezioak:
- 3 aste: 89 € (tarifa sozialarekin 42 €).
- 4 aste: 112 € (tarifa sozialarekin 54 €).
- Hirugarren seme-alabatik aurrera: doakoa.
Tarifa soziala eska daiteke baldintza ekonomiko jakinak betetzen badira.
Uda Kirol Kanpusa: kirola eta aisialdia uztartuz
2025eko udako kirol kanpusa 2012-2016 artean jaiotako haurrei zuzenduta dago, eta helburua da jarduera fisikoaren bidez bizimodu osasuntsua sustatzea.
Kanpusaren ezaugarriak:
- Kirol anitzeko jarduerak: piraguismoa, beisbola, hockeya, irristaketa, badmintona, eskubaloia, saskibaloia, futbola, tenisa, natur jarduerak eta ur jolasak.
- Agorrosingo instalazioak eta ingurua izango dira erreferentzia gune nagusiak.
Izen-ematea:
- Apirilaren 28tik maiatzaren 12ra.
- Online (www.bergara.eus eta www.bergarakirola.eus) edo Agorrosinen bertan.
Prezioak:
- 3 aste: 89 € (tarifa sozialarekin 42 €).
- 4 aste: 112 € (tarifa sozialarekin 54 €).
Izena emateko lehentasuna Bergaran erroldatuek izango dute. Behin behineko zerrendak maiatzaren 13an argitaratuko dira, eta, behar izanez gero, maiatzaren 14an zozketa egingo da.
Udako igeriketa kanpaina eta gazteentzako kirol eskaintza berezia
Igeriketa kanpaina:
- 2013-2021 artean jaiotakoentzat.
-
Bi txanda:
- 1. txanda: ekainaren 23tik uztailaren 4ra.
- 2. txanda: uztailaren 7tik 18ra.
- Ordutegiak: 16:00etatik 18:15era, talde mailaren arabera.
Prezioak:
- Abonatuak: 40,21 €.
- Ez abonatuak: 82,03 €.
Maila egiaztatzeko, behar izanez gero, froga bat egin beharko da Agorrosinen.
Gazteentzako udako kirol kanpaina:
- 2007-2013 artean jaiotako gazteei zuzenduta.
- Multi-training saioak: areto txirrinda, kros fita, TRX, eskalada eta padel ikastaroak.
- Prezioak aldatu egiten dira jardueraren eta abonatu izatearen arabera.
Izen-emateak:
- Apirilaren 25etik maiatzaren 6ra.
- Online (www.bergara.eus) edo Agorrosinen bertan.
Informazio gehiago eta izen-ematea:
- Webguneak: www.bergara.eus | www.bergarakirola.eus
- Agorrosin Ekintza Gunea: 943 77 91 59
- Udaletxeko B@Z zerbitzua: 943 77 91 00
Bergarako Udalak hautaketa prozesua jarri du martxan gizarte langile bat aldi baterako izendatzeko. Prozesua oinarri arautzaile batzuen bidez egituratu da, eta euskararen ezagutza 4. Hizkuntza Eskakizunaren (4.HE) mailan egiaztatzea izango da betekizunetako bat, derrigortasun data gainditua baitauka.
Izendapenak izango duen iraunaldia 2025eko ekainaren hasieratik abenduaren 31ra artekoa izango da, eta %100eko lan-jarduna eskatuko da. Urteko soldata gordina 40.555,26 eurokoa izango da, eta lanegunak zein ordutegia Udalak urtean-urtean ezartzen dituenak izango dira.
Oinarrietan jasotzen ez den guztian, eta izaera behin-behinekoarekin bateragarria denean, Udalaren lan-hitzarmena aplikatuko da. Nabarmendu beharra dago deialdi honekin ez dela lan-poltsarik osatuko.
Eskaerak aurkezteko epea 2025eko apirilaren 30ean amaituko da.
Informazio gehiago: https://www.bergara.eus/eu/node/20539
Bergarako Udalak bi laguntza-lerro jarri ditu martxan 2025ean herriko ekosistema ekonomikoa sustatzeko: alde batetik, enpresa berriek lokalen alokairurako laguntzak (20.000 euro), eta bestetik, Eragin programa, Bergaran kokatuta dauden edo kokatu nahi duten enpresentzat (30.000 euro). Guztira, 50.000 euroko aurrekontua bideratuko da.
Alokairurako laguntza berritzaileei bultzada emateko:
Programa honek enpresa berrien jarduera abiatzeko lehen urratsa erraztea du helburu, batez ere hutsik dauden lokalak berreskuratzeko, eta belaunaldi arteko erreleboari laguntzeko. Bergaran jarduten duten edo jardun nahi duten enpresek jaso ahal izango dute laguntza hau, baita jarduera eskualdatu duten enpresek ere, betiere 2024ko urtarrilaren 1etik aurrera sortuak badira.
Eragin programa: Bergaran errotutako enpresentzat
Bigarren dirulaguntza-lerroak jarduera ekonomikoa mantendu eta indartzea du helburu herriko merkataritza eta industria guneetan. Honako baldintzak bete behar dira laguntza hau eskatzeko: lantokia Bergaran egotea, baita egoitza soziala eta fiskala ere; zerga eta gizarte-segurantzako betebeharretan egunean egotea; eta sexuaren ziozko diskriminaziorik ez egotea, besteak beste.
Interesdunek eskaera egin dezakete Bergarako Udalaren erregistro elektronikoaren bidez.
Oinarri guztiak eta informazio zehatza eskuragarri daude udalaren webgunean: www.bergara.eus/eu/dirulaguntzak