Turismo jasangarria sustatzeko plana lantzen hasi da Udala sektorearen parte hartzearekin
2020. urtean, Bergarako Udalak, turismo plan berria behar zela ikusi zuen, eta horrela egitea jaso zuen Gobernuak legealdirako planean. Aurkeztu ziren eskaintzen artean, Gasteizko Beinke enpresari esleitu zitzaion kontratua, eta otsailaren hasieran bost fasez osatutako plana idazten hasi zen.
2009an, Bergarako Udalak 'Bergarako ondare kulturalaren interpretazio eta dinamizazio plan' baten erredakzioa kontratatu zion Stoa enpresari. Ondare historiko eta kulturala, eta batez ere, hezkuntza ondarea eta ondare zientifikoaren balioak nabarmentzen zituen honek.
Proposamen horretan hainbat ekimen aurreikusten ziren eta denboraren poderioz horietako asko gauzatu dira. Halaber, ondorioztatu da kulturaren eta ondarearen gizarteratzean hobekuntza asko egin direla, baina turismoaren gaian beharrak ikusi dira. Batetik, urte dezente pasa direnez aldaketa asko gertatu da, baita turismoaren sektorean ere, eta bestetik, estrategia global bat beharko litzatekeela ikusi da.
Oraingo planaren helburua da Bergarako turismo eremuaren diagnostikoa egitea, beti turismo jasangarriaren ikuspegitik eta turismo plangintzaren abiapuntua ezarriko duena izatea.
Diagnostikoa abiapuntu hartuta, helburu eta ildo estrategikoak zehaztuko dira, eta baita adostutako helburuak lortzeko egin beharko den ekintza plana ere. Ekintza plan hori 2022-2025 urteetarako izango da.
Lehen bi faseetan udalerriaren turismo ibilbidea aztertu eta datuak bildu dira hainbat instituzioetatik eta estatistika iturrietatik.
Sektoreko eragileekin partekatuko den prozesua da hau, hotel, landetxe, jatetxe, turismo zerbitzu enpresak... Horretarako, Bergarako turismo arloko enpresen zerrenda identifikatu ondoren, galdetegia bidali zitzaien eta ondoren topaketa bat egin da haiekin, apirilaren amaieran. Topaketa honetan, AMIA aztertu dute elkarrekin.
Bileran ateratako emaitzak aztertu eta sailkatu ondoren, beste bi topaketa egingo dira. Lehena lan-taldearekin formulazio estrategiko, jarduera programen ardatzen zirriborroa lantzeko eta adosteko. Eta azkena 2022-2025 urteetarako ekintza-planaren zirriborroa lantzeko eta adosteko.
Plana aurkeztea izango da indarrean jarri aurretik egingo den azken urratsa. Aurreikuspena da udarako lana amaituta egotea.
Omenaldi xume baina hunkigarria 1936ko 'gerrako umeei'
Intxorta 1937 Kultur Elkarteak eta Bergarako Udalak omenaldia egin diete Seminarixoan Bergarako 1936ko 'gerrako umeei'.
Ainhoa Lete Bergarako Alkateordeak pertsona hauek egin zuten bi norabideetako bidaiari erreferentzia egin dio. Ez du ahaztu, halaber, gerrako haur hauek hartu zituzten herriek, pertsonek eman zietena. Gaur egun ere haur askok sufritzen duten derrigorrezko erbestea gogora ekarri du. “80 urte pasata ere drama askok elkarren arteko berdintasun handia dute. Ez dezagun ahaztu eta enpatia izan dezagun gure babesa eta ulermena behar duten pertsonekin, adierazi du Alkateordeak.
Letek omendutakoei esan die: “abiatzea, gehiegitan partitzea, banatzea da. Habanan eta beste ontzi batzuetan itsasoak zeharkatu zenituzten neska-mutilek, kartoizko bihotzak lepotik zintzilik zenituztela, bihotza erdibituta daukazue, zuen oroitzapenen zati bat, zuen historia, zuen nortasuna ere Frantzian, Ingalaterran, Sobietar Batasunean edo munduko beste txoko batzuetan izandako esperientzietatik pasatzen baitira”.
Mikel Gomez Intxorta 1937 elkarteko kideak esan duenez, “duela urte eta erdi, zuen istorioak ezagutzen hasi ginenetik, ezusteko ugari izan ditugu: Lehena, gure bailaran, 80 pertsona bizirik zaudetela jakin izan dugu, horien artean zuek guztiok. Bigarrena, erbestean zenbat jaio ziren. Hemen adibide batzuk baditugu. Eta hirugarrena zenbat ume hil ziren ihesaldian”.
Frontean borrokatu gabe ere gehien sufritu zutenak izan zirela esan die Gomezek. Umeek ulertzen ez zuten gerra batean murgilduta ikusi zuten haien burua, ihesean.
Jon Ganbra Gipuzkoako Foru Aldundiko Giza Eskubideen Zuzendariak, bere aldetik, elkarteek memoriaren berreskuratzean egiten duten lana aitortu du. Intxorta 1937 Kultur Elkartearen lana Debagoienetik Gipuzkoa osora zabalduko dela ere esan du ekitaldian.
Iñigo Arregik egindako 'Egiaren Iturria' eskultura bana jaso dute erresistentziaren oroigarri gisa.
Carmen Ambroy Aranzabal, Jose María Ambroy Aranzabal, Joseba Askasibar Garate, Garbiñe Arrieta Aztiazaran, Ana Maria Arruabarrena Etxezarreta, Manuel Arruabarrena Etxezarreta, Albiñe Azkarate Garai, Edurne Begiristain Urzelai, Narciso Begiristain Urzelai, Maria Francisca Begiristain Urzelai, Silvestre, Begiristain Urzelai, Eulogio Díez Sánchez, Julia Ezenarro Arostegui, Maria Dolores Estevez Saez, Lucía Farras Laskurain, Esther Farras Laskurain, Anastasio Herran Izarra, Mari Carmen Herran Izarra, Jose Luis Irazabal Nuez, Montserrat Masatc Aranzabal Sol Telleriarte Egidazu, Maria Pilar Urzelai Arenaza, Francisco, Urcelay Arenaza, Trini Urzelai Arenaza, Esther Viciola Velasco, Pilar Viciola Velasco eta Felipe Zuñiga Sanchez dira Intxorta 1937 Kultur Elkarteak bizirik daudela identifikatu dituen bergararrak.
Urte hauetan hildakoak ere gogoan izan dituzte ekitaldian eta minutu bateko isilunearekin egin diete gorazarre.
Goyeneche fundazioak Bergaran duen egoitza ezagutzeko ateak zabaldu dizkie eragile eta herritarrei
2019ko abenduaz geroztik dago Bergaran Goyeneche Fundazioak kudeatzen duen Garagunea martxan, Mintegi kalean. Osasun pandemiaren ondorioz ezin izan zuten behar bezalako inauguraziorik egin eta haien lana bergararrei erakutsi. Horregatik, une honetan, egoitza ezagutzera emateko erakunde eta elkarte desberdinak gonbidatzen ari dira, zer diren eta zer lan egiten duten azaltzeko.
Bergarako Udalaren izenean Gorka Artola alkatea, Ainhoa Lete alkate ordea eta ongizateko zinegotzia eta Xabier Legorburu Gizarte Zerbitzuetako arduraduna joan dira eguneko zentroa bertatik bertara ezagutzera.
Irabazi-asmorik gabeko erakundea da, eta bere egitekoa adimen-desgaitasuna duten helduei eguneko arreta-zerbitzua eskaintzea da. Udal ordezkariei azaldu dietenez, “gure misioa adimen-desgaitasuna duten pertsonen bizi-kalitatea hobetzen laguntzea da. Beren helburu eta xede pertsonalak lortzen lagundu nahi diegu, eta, era berean, aktiboki parte hartu ahal izango duten ingurunea sustatzeko lan egiten dugu, gainerako herritarren eskubide berberekin”.
Euren egoitza ezagutu nahi duen edonori bisitan joateko aukera eskaintzen diote.
Eragileekin datorren astean hasiko da 'Bergara 2030 egin herrixa' plan estrategikoaren osatze prozesua
Datorren astean hasiko dira 'Bergara 2030 egin herrixa' plan estrategikoa garatzeko eragileekin bilerak. Udala, herriko eragile eta herritarren artean egingo den, eta ikuspegi integrala izango duen plana da hau.
“Etorkizuneko Bergararen diseinua berau osatzen dugunon artean partekatutakoa izan behar da”, hori da egitasmoa gauzatzeko oinarrizko premisa Udal Gobernuarentzat eta ildo horri jarraituz abiatuko dira eragileekin arlokako bilerak. Bilera hauen helburua arloka plan estrategikoak izango duen ekintza plana diseinatzea da, helburuak definitu eta horiek betetzeko ekintzak proposatzea, alegia.
Maiatzaren 17an, 18;00etan batuko dira pleno aretoan mugikortasun eta lurralde arloetako eragileak gai horiei lotutako ekintza plana diseinatzen hasteko. Hurrengo egunean, maiatzaren 18an, ordu berean, baina UNEDen, ekonomia arloko eragileen txanda izango da. Hurrengo asteetan herritarren arloko eta ingurumen arloko bilerak ere egingo dira. Aurrerago herritarrekin ere egingo da lanketa.
Bestetik, udal barruan dagoeneko hasi dira plan estrategikoko arloetako bilerak egiten.
2030 urtera begirako plana osatzen hasi aurretik udalerriaren diagnostikoa idatzi da. Hau, apirilaren 15ean aurkeztu zen jendaurrean Seminarixoan egin zen ekitaldian. Erakusketa bat ere osatu da Bergaraz egin den argazki horrekin eta Agorrosin kirol guneko goiko pisuan dago ikusgai apirilaren 23az geroztik, Agorrosin irekita dagoen ordutegian.
Liztor beltzaren tranpatze kanpaina positiboa izan da
2.172 liztor beltzen erregina harrapatu dira horretarako egin den kanpainan.
Normalean bi hilabetez egiten badira halako kanpainak, Bergaran hilabetez egin da, eta horregatik dira are esanguratsuagoak aipatutako emaitzak. Kanpaina positiboa izan da beste batzuekin alderatuta, Erlantz Olabarria Gipuzkoako erlezainen elkarteko kidearen eta Bergarako tranpatzearen ardura izan duen pertsonaren ustez.
Esperientzia pilotu gisa egin da Bergarako kanpaina hau. 50 tranpa jarri dira herrian zehar banatuta, kopuru nahikoa handia beste kasu batzuekin alderatuta, adituaren ustez. Astero egin dute tranpen jarraipena.
Gipuzkoako Foru Aldundiak baimendutako kanpaina izan da, Bergarako Udalak sustatu eta Gipuzkoako erlezainen elkartearekin elkarlanean egin dena.
Lana egiten aritu den erlezainen elkarteko kideak azaldu duenez, ez zuten uste datu hauek hilabetean jasotzeko aukerarik egongo zenik. Baina, asko lagundu du aurretik leku asko identifikatuta zituela dagoeneko Bergarako Udalak, udaltzaingoak egindako lanaren bitartez, eta horrek lana eraginkorragoa izatea ahalbidetu du. Puntu bero horietan egin dute lan, izan ere, urtez urte kokaleku berberak erabiltzen dituzte liztor beltzek apiak kokatzeko.
Beste leku batzuetan frogak egin dituzte, aurretiaz fokuak identifikatuta eduki gabe eta emaitzak oso bestelakoak izan dira, okerragoak.
Liztor beltzak eragiten duen kalteari aurre egiteko moduetako bat da hau. Hemendik hilabete batzuetara ikusiko da erleetan izan duen eragin positiboa, erasoa saihestu delako, baina jaso den liztor kopurua aintzat hartuta, Olabarriaren ustez, emaitza oso ona izango da.
Herriko puntu desberdinetan jarri dira 50 tranpak, bai herrigunean eta baita auzoetan ere. Daturen bat aipatzearren, Elorregi auzoan, adibidez, puntu bero bat dago eta 136 erregina jausi dira bertan. San Pedroko elizako aterpean, aitzitik 1 edo 2 bakarrik.
Erabili diren tranpak komertzialak dira, pertsonentzat kalterik eragiten ez dutenak. Zuhaitzetan jartzen dira normalean. Sustantzia bat botatzen dute ontzira liztor beltza erakartzen duena, baina ez erlea (horrela ekiditen da erleak ere hiltzea). Likidoak erakarri egiten ditu eta ondoren bertan itotzen dira liztor beltzak.