Bergarako Udala

Itzuli Basque Challenge lasterketak laugarren edizioa aurkeztu du gaur, martxoak 25, Bergaran, probaren xehetasun nagusiak ezagutzera emateko egin den ekitaldi ofizialean. Ibilaldiak 2026ko Itzuliaren seigarren etapako ibilbidea errepikatuko du, aurreko edizioekin alderatuta kokapen aldaketaren berritasun handiarekin. Probak parte hartzaile kopuru ona mantentzen du, eta zikloturisten egutegian finkatzeko prozesuan jarraitzen du.

Korrika-k Bergara zeharkatuko du datorren martxoaren 28an, eta horren ondorioz trafikoan eraginak izango dira goizaldean. Korrika 06:15ak aldera iritsiko da Elorregitik, eta Labegaraieta aldetik sartuko da herrigunera.

Korrikaren ibilbide osoak honako guneak hartuko ditu:

Ibarra kalea → Ozaeta → Zubiaurre → San Antonio biribilgunea → Ibargarai → Zurradero → Herrilagunak → Domingo Irala → Irizar ibilbidea → Artekalea → Ariznoa plaza (San Pedro plaza) → Bidekurutzeta → Espoloia → Mintegi kalea → San Antonio biribilgunea → Urteaga → Antzuola noranzkoa.

Korrikaren giroak astindu egingo du Bergara eta eskualdea martxoaren 27an eta 28an, herrian antolatutako ekitaldi ugarirekin. Korrika Txikiak, kultur emanaldiak, bertso saioak, kontzertuak eta txokolatadak osatuko dute egitaraua. Gainera, martxoaren 29an Bilborako autobus bereziak egongo dira Korrikaren amaierara joan nahi duten herritarrentzat.

Ostirala, martxoak 27

Bedelkar-ek, Bergarako merkataritza, ostalaritza eta zerbitzuen elkarteak, azken urtean zehar bere irudi korporatiboaren berritze prozesu sakona gauzatu du, komunikazioa eguneratzeko eta bere posizionamendua sendotzeko helburuarekin.

Aldaketa horren baitan, identitate bisual eta logotipo berria sortu da, oinarri kolore gisa Bergarako urdina (mahon) hartuta; herriaren iragan eta tradizio ehungilearekin estuki lotutako tonalitatea.

Gipuzkoako Foru Aldundiak Eskualdeko Sareko errepideen zoruaren birgaitze iraunkorreko lanak egingo ditu datozen egunetan, eta horiek trafikoan eragin nabarmena izango dute Bergarako Ubera auzoaren inguruan, GI-2632 errepidean, 30,330 eta 30,610 kilometro puntu artean.

Lanok direla eta, aurreikusten da ostegunean, martxoaren 26an, edo ostiralean, martxoaren 27an, eguraldiaren arabera, 8:00etatik 20:00etara errepidea itxita egongo dela aipatutako tartean, bi noranzkoetan.

Bergara Oinez 2019an sortu zen, herriko hainbat elkarte eta eragileren arteko elkarlanari esker. Ekimenaren helburua da bergararren osasuna sustatzea eta herritarren arteko harremanak indartzea. Aurten zortzigarren ediziora iritsiko da. Lehen irteera ostegun honetan, martxoak 26, ospatuko da, Agorrosinetik irtenda, 10:00etan.

Aurten ere, herriko 13 eragileren parte-hartzearekin, Bergara Oinez egitasmoa martxan jarriko da. Martxoaren 26tik urte amaierara arte, guztira hamabost ostegunetan ibilaldi gidatuak antolatuko dira, guztiak Agorrosinetik abiatuta.

Ostegun honetan, martxoaren 26an, EH Itzulia 2026 ofizialki aurkeztuko da Bergaran. Aurkezpena Seminarixoan egingo da 12:00etatik aurrera, eta bertan izango dira erakundeetako ordezkariak, antolakuntza taldea zein babesleak.

Ekitaldian parte hartuko dute, besteak beste, Bergarako Udaleko ordezkariek, OCETAko arduradunek, Eusko Jaurlaritzako Kirol Zuzendaritzak, Gipuzkoako Foru Aldundiak, eta Itzuliaren babesle nagusietako hainbat ordezkarik.

Bergarako Udalak jakinarazi du Kontuhartzailetzako kontabilitate administrariaren lanpostua aldi baterako betetzeko hautaketa prozesua jarri duela martxan. Deialdia arautzen duten oinarriak jada argitaratuta daude Udalaren webgunean.

Besteak beste, hautagaiek Batxiler titulua edo titulu teknikoa izatea izango dute parte hartzeko betekizunetako bat.

Bergarako Udalak eta Osakidetzako Debagoieneko ESIak adinekoei erorikoak prebenitzeko tailer berezia antolatu dute apirilaren 21 eta 23rako. Ekimenak San Joxepe elkartearen eta Bergarako Osasun Zentroaren arteko lankidetza biltzen du, eta adinekoen artean gero eta ohikoagoak diren erorikoen arriskuez ohartarazteaz gain, horiek saihesteko tresna praktikoak eskainiko ditu.

Bergarako Udalak jakinarazi du Burdiñateko bidegurutzean, hau da, Barrenkalea eta Masterreka kaleen arteko eremuan, asfaltatze lanak egingo direla. Horren ondorioz, asteazken honetan, martxoaren 18an, kalea guztiz itxita egongo da trafikorako momentu puntualetan, eta Bolu eta Elosu auzoetarako ibilgailuen joan-etorriak Artekalea kaletik bideratuko dira.

Trafikoaren aldaketa hau behar bezala seinaleztatuta egongo da eta lanak burutzen dituen enpresako langileek gainbegiratuko dute uneoro.