Bergarako Udala

Bergarako Udalak balorazio positiboa egin du aurtengo Pentekosteen jaien inguruan. Aurten, San Martin plazako obrek eragindako lekualdaketek erronka berezia ekarri dute antolakuntzan, baina udalaren ustez, herritarren, eragileen eta elkarteen inplikazioari esker jaiak arrakastaz garatu dira.

Bergarako Udalak Artzamendi kalean, 1etik 21era bitarteko atarien parean dagoen ezpondaren garbiketa eta sasitza kentzeko lanak hasi dituela jakinarazi du. Zehazki, mendira ematen duen atzealdean esku hartuko da, goiko trenbidera doan bidearen azpialdean eta aisialdirako gunearen azpialdean dagoen eremuan.

Euskal Herri osoko 200 herri baino gehiagotako alkate eta udal ordezkarik bat egingo dute Bergaran datorren igande goizean, hilaren 19an, Foruen abolizioaren 150. eta Alkateen Mugimenduaren 50. urteurrenak oroitzeko egingo den ekitaldi politiko-instituzionalean. Bergarako Udala eta Gipuzkoako Foru Aldundia elkarlanean ari dira antolatzen hitzordu garrantzitsu hori, zeinak karga sinboliko handia izango duen, iragana, oraina eta etorkizuna lotuz hitzen, musikaren eta dantzaren bitartez.

Amillaga 2ko lursailean egiten ari dien obrak direla eta, Ernai kalea itxita egongo da uztailaren 14tik 17ra. Egoiliarren eta zamalanen joan-etorriak bermatzeko, Ernai kalea bi noranzkoetan habilitatuko da, Antziturri aldetik sartu eta irten ahal izateko.

Obrek eragingo duten itxiera biribilgunetik Helmuga kafetegirainoko tartea izango da, eta bertatik ibilgailuak atera beharko dira.

Oraindik ere zabalik dago Bergarako Udalak sustatutako Maria Oianguren ikerketa sariaren deialdia. Ekimenaren helburua Bergarako euskarari buruzko ikerketa-proiektuak bultzatzea da, bereziki ikertzaile gazteen eta unibertsitateko ikerlarien lana sustatuz.

Deialdiak 3.000 euroko dirulaguntza eskaintzen du, eta Bergarako euskararekin lotutako askotariko gaiak jorratzeko aukera ematen du: hizkuntzalaritza, soziolinguistika, historia, antropologia, literatura, kazetaritza eta bestelako diziplinak. Aurtengo deialdian gaia librea da, betiere Bergarako euskararekin lotuta badago.

2026ko abuztuaren 12an izango den eguzki eklipse osoa dela eta, Eusko Jaurlaritzak herritarrei gogorarazi nahi die fenomeno astronomiko hau segurtasun neurri egokiak hartuta behatu behar dela, ikusmenean kalte larriak saihesteko.

Bergarako San Kristobalgo jaiak ospatuko dira uztailaren 9tik 12ra bitartean. Jaiak uztailaren 9an, ostegunean, hasiko dira, piñuarekin eta auzo-afariarekin.

Uztailaren 10ean, ostiralean, eguerdian meza egingo da, eta ondoren luntxa eta Aliritzi taldearen emanaldia izango dira. Gauean, 21:00etan, auzo afaria ospatuko da, musikaz girotuta.

Larunbatean, uztailaren 11n, gaueko 23:00ak aldera erromeria egongo da Eingo taldearekin.

Jaiak igandean, uztailaren 12an, amaituko dira, 12:00etan egingo den meza eta ondorengo luntxarekin.

Bergarako Udal Euskaltegiak C1 mailako ikastaro trinkoa eskainiko du datorren irailean, euskararen ezagutza maila aurreratu nahi duten herritarrei zuzenduta.

Ikastaroa irailaren 4tik 28ra bitartean izango da, eta astean hiru saio egingo dira: astelehenetan, asteazkenetan eta ostiraletan, 16:30etik 18:30era. Saio bakoitzak bi orduko iraupena izango du.

Ikastaroaren prezioa 39 eurokoa da, eta izena emateko epea uztailaren 10era arte egongo da zabalik, eta matrikula Bergarako Udal Euskaltegian egin beharko da (Barrenkalea 33, Irizar jauregia).

Ekainaren 28a memoria, aldarrikapen eta ospakizunerako eguna da. Gaur, LGTBIQ+ pertsonen eskubideen alde egindako borroka aitortzen dugu, eta gure gizartea bidezkoagoa, askeagoa eta anitzagoa izan dadin urteetan zehar lanean aritu diren pertsona eta kolektibo guztiei aitortza egiten diegu.

San Martzial jaiak ospatuko dira igandean, uztailaren 5ean, Bergaran, eta dagoeneko prestaketa lanak martxan daude. Udalak hainbat neurri eta zerbitzu aurreikusi ditu, jai eremura bertaratzen direnei gauzak erraztu asmoz.

Zerbitzuak eta neurriak:
San Martzialera joateko Herribus zerbitzua eskainiko da, goizeko (09:30–14:00) eta arratsaldeko (16:00–20:30) ordutegian, Oxirondo eta San Martzial lotuz. Bidaia bakoitzaren prezioa 1,10 eurokoa izango da, eta 10 bidaiako txartela 6 euroren truke eskuratu ahal izango da.