Bergarako Udala

Azken egun hauetan Vic-eko eta Manresako hainbat ekoizle eta erakunde publikoetako ordezkariak izan dira Bergaran bisitan. Besteak beste, Super Coop Manresa, L’Obradora eta Manresa eta Vic-eko Udaleko ordezkariak hurbildu ziren Oxirondo Azoka eta Elikaenea proiektua gertutik ezagutzera.

Bisita hauen bidez, esperientziak partekatzeko eta elkarlan berriak aztertzeko aukera izan zuten bi herrietako eragile eta Udal ordezkariek, betiere helburu komun batekin: egungo erronkei erantzuteko gai diren azoka biziak eraikitzea, ikuspegi publiko-komunitariotik abiatuta.

Olaso Dorrea Fundazioak eta Bergarako Udalak jakinarazi dute datorren ostegunean, martxoaren 27an, ospatuko dela Monzon-Ganuza 2025 sariaren banaketa ekitaldia, arratsaldeko 18:30ean, Seminarixoa aretoan.

Aurtengo sariduna Amaia Zubiria musikaria da, euskal musikagintzari eta kulturari egindako ekarpen paregabeagatik. Ekitaldian, Zubiriaren ibilbidea eta lana omenduko dira, eta bertan izango dira hainbat senide, lagun eta adiskide, artista handia laguntzeko eta ospatzeko.

Martxoaren 20an, haize bolada bortitzek Agorrosin igerilekuko estalpean eragindako kalteen ondorioz, kirol zentroa eta inguruko espazioak aldi baterako itxi behar izan zituen Udalak, segurtasuna bermatzeko helburuarekin.

Martxoaren 21ean, arratsaldez, espezializatutako enpresa batek teilatuan eroritako zatiak kendu ditu, solte zeudenak finkatu, eta estalpeko egitura egonkortu du. Egindako lanen ondoren, segurtasuna bermatuta dagoela baieztatu ahal izan du Udalak.

Haizetearen ondorioz, ostegun gauerdian Agorrosingo teilatuaren zati batek kalteak pairatu ditu. Teknikari eta adituek Agorrosingo teilatuaren egoeraren inguruan egindako balorazioaren arabera, kiroldegia eta inguruko esparrua datorren asteartera arte itxita egongo da.

Lehentasuna herritarren segurtasuna bermatzea den heinean, lanak baldintza klimatologiko onetan egin behar dira, eta ostegun eta ostiralerako aurreikuspenek ez dute lan horiek modu zuzenean egitea bermatzen.

Olaso Dorrea Fundazioak eta Bergarako Udalak ematen duten Monzon-Ganuza Euskal utopikoei aurtengo saria Amaia Zubiriak jasoko du martxoaren 27an, 18:30ean, Bergarako Seminarixoa aretoan egingo den ekitaldian.

Bergarako Udalak, Gipuzkoako Foru Aldundiarekin, Ordiziako Udalarekin eta Haurralde fundazioarekin lankidetzan, aniztasuna eta inklusioa sustatzeko kirol gida berria aurkeztu du prentsaurreko batean, Donostian. Gida hau udalerri mailan inklusioa bultzatzeko eta jarduera fisikoaren bidez gizarte-kohesioa sendotzeko tresna baliotsu gisa aurkezten da. Aurkezpenean izan dira Goizane Alvarez Irijoa Kultura eta Kirol diputatua, Gorka Artola Bergarako alkatea, Adur Ezenarro Ordiziako alkatea eta Jaqueline Bica Haurraldeko komunikazio teknikaria.

Pentekoste jaiak antolatzeko hurrengo jai batzordea martxoaren 18an izango da, 18:30ean UNEDen. Hau hirugarren saioa izango da, eta herritar nahiz eragile guztiak parte hartzera gonbidatuta daude, festak ahalik eta herrikoi eta parte-hartzaileenak izan daitezen.

Anima zaitez eta ekar ezazu zure proposamena!

‘Elkar mugituz egingo dugu’ lelopean egingo da aurten laugarren Euskaraldia, maiatzaren 15etik 25era. Euskaraldiaren laugarren edizioa izango da, eta data berriarekin dator gainera: udaberri giroan egingo da maiatzaren 15etik 25era bitartean. Entitateek eta norbanakoek izena emateko epea zabalik dute, eta Euskaraldia.eus webgunean dago aukera.

Bergarako Elikadura Mahaiak sustatutako “ekoizpen duina, kontsumo herrikoia” heziketa programa amaitu berri da eta harrera bikaina izan du. Herriko ikastetxe guztiek parte hartu dute, eta 400 ikasletik gora aritu dira 17 saio ezberdinetan (2024ko abendutik 2025eko otsailera).

Bergarako Udalak eta hainbat erakunde eta elkartek Bergara Oinez 2025 egitasmoa aurkeztu dute, herritar guztiei zuzendutako ibilaldi osasungarriak antolatuz. Ekimen honen bidez, 60-90 minutuko ibilaldiak eskainiko dira urte osoan zehar, osasuna sustatzeko eta komunitatea sendotzeko asmoz.

Lehenengo ibilaldia martxoaren 20an izango da, Pol-Pol elkartearen antolakuntzapean. Ondoren, hileko hainbat astetan ibilaldi berriak egingo dira, Agorrosinen hasiera eta amaiera puntutzat hartuta, betiere goizeko 10:00etan abiatuta.